ესპანეთის პრიმერადივიონში დავიდ ვილიას 150 გატანილი ბურთი დაუგროვდა. ეს ფაქტი 8 იანვარს, "დეპორტივოსთან”გასვლით მატჩში (0:4) მოხდა. დავიდმა ლეო მესის შესანიშნავი გადაცემა გამოიყენა და შეხვედრაში ანგარიშიც გახსნა.
"ბედნიერი ვარ ამდენი გოლის გატანით. ყველაზე მთავარი კი ის არის, რომ ამის გაკეთება "ბარსელონაში” თამაშის დროს შევძელი. ბრწყინავალე გუნდში ვირიცხები”, - განუცხადა ვილიამ Goal.com-ს.
ვილიას "ბარსელონამდე”, ”სარაგოსასა” და "ვალენსიაში” უთამაშია. პრიმერას მიმდინარე გათამაშებაში ვილიამ 12 გოლი გაიტანა და ბომბარდირთა დავაში მე-3 ადგილზე იმყოფება.
 

მიუნხენის "ბაიერნი” ბუნდესლიგის მე-2 წრისთვის ყატარში ემზადება. გერმანელებმა ამხანაგური მატჩი გამართეს ადგილობრივ კლუბ "ალ-ვაკრასთან”. "ბაიერნმა” მეტოქე ძალიან იოლად - 4:0 დაამარცხა.
ამ შეხვედრაში, ყველაზე მნიშვნელოვანი, არიენ რობენის მოედანზე გამოსვლა იყო. ჰოლანდიელ ნახევარმცველს, 2010 წლის მუნდიალის ფინალის შემდეგ არ უთამაშია.
Goal.com-ის ცნობით, რობენის დაბრუნებამ, ძალიან გაახარა მთავარი მწვრთნელი ლუის ვან გაალი. "ბაიერნი” 15 იანვარს, ბუნდესლიგის მე-18 ტურში, "ვოლფსბურგს ეთამაშება და ჰოლანდიელი სპეციალისტი დარწმუნებულია, რომ არიენთან ერთად "მგლების” დამარცხება უფრო ადვილი იქნება.

პრაქტიკულად უკვე გადაწყვეტილია _ რონალდინიო, რომელიც ორნახევარი სეზონის განმავლობაში "მილანის” ღირსებას იცავდა, კარიერას "ფლამენგოში” გააგრძელებს. ეს ამბავი გუშინ, "როსონერის” ვიცე-პრეზიდენტ ადრიანო გალიანისა და ბრაზილიური კლუბის პრეზიდენტ პატრისია ამორიმის შეხვედრაზე გადაწყდა. ასე რომ, ამით წერტილი დაესვა გავრცელებულ ხმებს იმის თაობაზე, თითქოს "დინიო” მის მშობლიურ "გრემიოში” აპირებდა დაბრუნებას.
"მე და "ფლამენგოს” პრეზიდენტი ყველაფერზე შევთანხმდით. ჩემი აზრით, რონალდინიო 99,9%-ით უკვე "ფლამენგოს” ფეხბურთელია”, - აღნიშნა პრესასთან საუბრისას გალიანიმ.
ბრაზილიური კლუბის პრეზიდენტმა კი დაამატა, რომ 30 წლის ვარსკვლავთან პირადი კონტრაქტის მცირე დეტალები ჯერ კიდევ შესათანხმებელი აქვს, რისთვისაც დაახლოებით 2-3 დღე დასჭირდება. შემდეგ კი, ფეხბურთელთან ხელშეკრულება ოფიციალურად გაფორმდება. რაც შეეხება კლუბებს შორის მიღწეული შეთანხმების ფინანსურ მხარეს, ამაზე საუბრისგან ორივე სუბიექტმა თავი შეიკავა.
ბოლოს შეგახსენებთ, რომ "მილანმა” რონალდინიო 2008 წელს "ბარსელონასგან” 18 მილიონ ევროდ შეიძინა. "როსონერის” შემადგენლობაში ჩატარებულ 82 შეხვედრაში მას 25 გოლი აქვს გატანილი, პარტნიორებს კი ასისტენტობა 28-ჯერ გაუწია. იმასაც დავამატებთ, რომ "ფლამენგომ” ბრაზილიის გასული ჩემპიონატი მე-14 ადგილზე დაასრულა.